धादिङको बेनीघाट राेराङ गाउँपालिकामा यही कार्तिक २५-३० सम्म विद्यालय स्तरीय विविध खेलकुद प्रतियोगिता आयोजना हुने भएको छ । 

विद्यालय तहमा अध्ययनरत विद्यार्थी (खेलाडी)हरूलाई खेल कौशल प्रदर्शन गर्ने अवसर प्रदान गर्नको लागि गाउँपालिका स्तरीय छैटौँ राष्ट्रपति रनिङ शिल्ड तथा मजदुर शहिद स्मृति कप वृहत् खेलकुद प्रतियोगिताको आयोजना गरिएको गाउँपालिका शिक्षा शाखा प्रमुख बोधराज पाठकले जानकारी दिए । 

त्यसैगरी यसै अवसरमा चाैँथाे अध्यक्ष कप क्रिकेट प्रतियोगिता र पाँचौँ मदन भण्डारी स्मृति कप फुटबल प्रतियोगिताको पनि आयोजना गरिएको गाउँपालिकाले जानकारी दिएको छ । 

प्रतियोगिताको उद्घाटन कार्तिक २५ गते बिहान १०ः३० बजे विशालटारस्थित चन्द्रोदय माविको प्राङ्गणमा हुने र समापन कार्तिक ३० गते बिहान ११ः०० बजे सोही स्थानमा हुने जनाएको छ । 

खेलाडी विद्यार्थीहरूकाे हौसला बढाउनको लागि खेलकुद प्रतियोगितामा सहभागी हुन गाउँपालिकाका सबै जनप्रतिनिधिहरू, सबै माध्यमिक विद्यालयहरू, सबै कर्मचारीहरू र सम्पूर्ण खेलप्रेमीहरूलाई गाउँपालिकाले अपिल गरेको छ ।

तस्बिरः बेनीघाट राेराङ गाउँपालिकाकाे वेवसाइटबाट ।